இடங்கணசாலை நகராட்சி பகுதியில் தூய்மை பணி குறித்து விழிப்புணர்வு பேரணி.

சேலம் மாவட்டம், இடங்கணசாலை நகராட்சி சார்பில் மாதத்தில் இரண்டு சனிக்கிழமை அன்று தூய்மை பணிக்கான விழிப்புணர்வு பணி மற்றும் உறுதிமொழி ஏற்பு , சுற்றுப்புற சுத்தம் உள்ளிட்டவைகளுக்கான சிறப்பு முகாம் நடைபெற்று வருகின்றன. இந்நிலையில் நகராட்சி பஸ் நிலையம் பகுதியில் இருந்து கே. வி. பி. தியேட்டர் ரோடு, நடராஜா தியேட்டர் ரோடு, காக்காபாளையம் மெயின் ரோடு, பழக்காரன் தோட்டம் உள்ளிட்ட பகுதிகளில் தூய்மை பணிக்கான விழிப்புணர்வு பேரணி நகராட்சி தலைவர் கமலக்கண்ணன் தலைமையில் நடைபெற்றது. இதில் நகரங்களின் தூய்மைப் பணிக்கான மக்கள் இயக்கம் சார்பில் எனது குப்பை, எனது பொறுப்பு என்ற குறிக்கோளுடன் அப்பகுதி மக்களிடையே விழிப்புணர்வு ஏற்படுத்தும் வகையில் துண்டு பிரசுரம் வழங்கி, உறுதி மொழி ஏற்கப்பட்டது. இதனை தொடர்ந்து மக்கும் குப்பை, மக்கா குப்பையை எவ்வாறு பிரித்து எடுத்து தூய்மை பணியாளர்களிடம் வழங்க வேண்டும் என பொது மக்களுக்கு விழிப்புணர்வு ஏற்படுத்தப்பட்டது. இம்முகாமில் நகராட்சி ஆணையாளர் (பொ) முஸ்தபா, 23 - வது வார்டு கவுன்சிலர் சரஸ்வதிபூபதி மற்றும் கவுன்சிலர்கள் சிவகுமார், நாகராஜ், விஜயலட்சுமிகுமார், சித்ராசதாசிவம், சுகாதார ஆய்வாளர் நிருபன்சக்கரவர்த்தி, பரப்புரை மேற்பார்வையாளர் கலைவாணி, பரப்புரையாளர்கள் மீனா, சங்கீதா, சந்தியா மற்றும் தூய்மை பணியாளர்கள், பொதுமக்கள் உள்ளிட்டோர் கலந்து கொண்டனர். இந்த சிறப்பு முகாமில் நகராட்சி தலைவர் கமலக்கண்ணன் கூறுகையில், இப்பகுதியில் விசைத்தறி மற்றும் அதன் சார்பு தொழிலில் பயன்படுத்தப்படும் ஜரிகை மற்றும் பிளாஸ்டிக் கழிவு பொருட்களை ஜவுளி உற்பத்தியாளர்களும், கடை உரிமையாளர்களும் தனித்தனியாக பிரித்து எடுத்து, அதனை நகராட்சி தூய்மை பணியாளர்களிடம் வழங்குமாறு கேட்டுக் கொண்டார். மேலும், குப்பைகளை கண்ட இடத்தில் கொட்டுபவர்கள் மீது நகராட்சி நிர்வாகத்தின் சார்பில் அபராதம் விதிக்கப்படும் என தெரிவித்தார்.