கொண்டலாம்பட்டி அருகே ஒரு டன் ரேஷன் அரிசி பறிமுதல். இரண்டு வாலிபர்கள் கைது. உணவு தடுப்பு போலீசார் அதிரடி.

சேலம் மாவட்டம், கொண்டலாம்பட்டி அடுத்த உத்தமசோழபுரம், சமத்துவபுரம் பகுதியில் இருசக்கர வாகனத்தில் வந்து ரேஷன் அரிசியை குறைந்த விலைக்கு வாங்கி அதிக விலைக்கு விற்பனை செய்து வருவதாக சேலம் மாவட்ட குடிமைப் பொருள் வழங்கல் குற்ற புலனாய்வு போலீசாருக்கு ரகசிய தகவல் வந்தன. இதனையடுத்து எஸ் ஐ பெரியசாமி மற்றும் போலீசார் அப்பகுதியில் சோதனையில் ஈடுபட்டனர். அப்போது உத்தமசோழபுரம், சமத்துவபுரம் பகுதியில் அவ்வழியே இருசக்கர வாகனத்தில் இரண்டு வாலிபர்கள் மூட்டையுடன் வந்தனர். இவர்களை போலீசார் பிடித்து விசாரணை செய்ததில் ஆட்டையாம்பட்டி மூவேந்தர் தெரு பகுதியைச் சேர்ந்த சரவணன் (25), ஆட்டையாம்பட்டி மாதேஸ்வரன் கோயில் தெரு பகுதியை சேர்ந்த மணிகண்டன் (26) ஆகிய இரண்டு பேர் ரேஷன் அரிசியை குறைந்த விலைக்கு வாங்கி, அதிக விலைக்கு வெளிமாநிலத்தில் விற்பனை செய்ய இருந்தது தெரிய வந்தது. இதையடுத்து போலீசார் இந்த இரண்டு வாலிபர்களையும் கைது செய்து, அவர்கள் பயன்படுத்திய வாகனம், விற்பனைக்கு கொண்டு சென்ற ஒரு டன் ரேஷன் அரிசி உள்ளிட்டவையை பறிமுதல் செய்து, சரவணன், மணிகண்டன் ஆகியோரை சேலம் நீதிமன்றத்தில் ஆஜர்படுத்தி, சேலம் மத்திய சிறையில் அடைத்தனர்.